早10多年，因工作關係到曼徹斯特市做英超訪問，當時曼聯仲係市內一哥，到奧脫福就係見識佢哋嘅氣魄同光輝；相反，到曼城前主場緬恩路，氣勢真係差一截。不過，帶我哋參觀球場嘅老伯就好熱情、好友善，比起紅魔公式化嘅接待更見人情味，呢位老伯仲好自豪咁講：曼城先係曼市嘅球隊。
當然，呢個係好多年前嘅事，曼城已經由油國入主，主場亦搬咗去伊蒂哈德球場，現代化、豪華化，拍得住曼聯。結果呢？歸屬感一樣流失。曼城周日踢埋今季英超最後一場主場，雖然俾阿仙奴逼和2:2，但表現唔太差；不過，比賽未完場已經有球迷陸續離開，據報留喺度聽領隊比歷連尼講告別宣言嘅球迷唔多於一萬。比帥面對咁多空凳講嘢，雖然比空場拋壽包好，但點都不是味兒啩。
好多人話比歷連尼走人係罪有應得，但小弟就唔係咁睇，好歹佢都幫曼城贏過一次英超、兩次英聯盃冠軍。當然，曼城使咁多錢買人，成績仲係唔達標；不過，曼城嘅管理制度唔同傳統英超球隊，唔係領隊一個人話事，反而由總監負責買賣。講真，曼城喺轉會市場成日做水魚，阿古路、奇雲迪布尼算成功，但破英格蘭球員轉會費紀錄收購嘅史達寧，除咗加盟頭幾場有啲料到，其餘都係得啖笑，中堅文加拉更係派膠保證。為咗減輕球會負擔，急急賣走迪斯高，韋菲特邦尼又成日傷，搞到冇中鋒支援阿古路，唔係伊恩拿祖彈起，曼城更加少入球。
冇人情味唔緊要，希望曼城球迷唔好冇記性，一定要熱烈地歡迎新帥哥迪奧拿加盟，又睇吓佢下季拎到咩成績。
文：牽牛