幾年前患上抑鬱症的薛凱琪（Fiona）痛哭過，受長期失眠困擾過，甚至輕生過。「死過翻生」後，她有所頓悟，學懂自選執着或放下。這一刻，快35歲的Fiona工作、愛情仍力求完美，應對負評就要放鬆以取平衡，再選擇性接受增進演技及歌藝的評語。由如同12年前首支派台歌《麥當娜一吻》靠偶像精神扶持的小妹妹，蛻變成自強的新一個她，「𠵱家可以做人哋嘅麥當娜咁，發放正能量、愛。」
統籌：林妙萍
造型、撰文：林嘉慈
攝影：郭賢興
攝錄：林德雄、陳志嵐
化妝：Jessica Chan of Jessica Chan Makeup Workshop
髮型：Jo Lam of Queen's Private i
薛凱琪去年主攻電影，憑《閨密》獲金像獎最佳女配角提名，今年專注於樂壇主場，首個企劃是rap出新態度，「以前好鍾意喊，因為對自己要求好高，對自己好苛刻，唱錯一粒字又喊，覺得自己做得唔夠好又喊，𠵱家嘅我，歌詞入面有講，如果俾人蝦就會略過，唔好俾佢影響到，如果有人講我唔好，聽咗之後，嗰樣嘢可以令我進步嘅，我反而會接受，𠵱家嘅我係自強。」
力求工作完美
經歷過抑鬱低潮，Fiona漸懂自救，「Click中我係乜都去得太盡，好執着，開始有啲嘢去到個break point，上天畀咗我一個啟示，去到好頂點時，條橡筋會斷。」越是逼迫，越是得到反效果，「感情上執着，工作上執着，新聞上個個要鍾意我，講到我最好，逼迫到自己脾氣唔好，工作咪一路往下坡。可能去到某啲位，開始到頂點，我唔想好似以前咁break down，就要學識放下一啲嘢。」
對於工作，她仍舊是個完美主義者，哪怕是調校一個音，都觸動神經，「人係冇完美，如果樣樣咁執着，我會失眠，好似之前咁要長期食安眠藥。𠵱家好多時都失眠，好夜先瞓，但起碼戒到安眠藥。」
等待神予愛情
面對愛情，她依然執着，不計較另一半的外表、家底，但超在乎內在條件，「起碼要專一、誠實、有責任感，希望大家對於生活，對人生理念、概念係一樣，差唔多啦，如果唔係好難一路走落去。」還堅持先相處，後拍拖，「從來冇試過一見鍾情，所有男朋友，雖然唔多，都一定係由朋友開始。有人話：『做咗朋友，拖手、講我愛你好奇怪』，我話：『唔係好熟，點講得落我愛你，同拖佢隻手？』」
眼看歌手好友吳雨霏、王菀之、楊愛瑾結婚，Fiona毫不着急，避免做錯選擇，「最唔應該俾周邊人影響你，咁好老土喎。每一個人快樂有佢嘅時候，就算我好似邊個邊個咁20歲結婚生仔，if我唔ready，個快樂就唔係屬於我。」
自認第六感強，正等待神給予顯示，「我覺得結婚仲未係，生BB更加未係，但有時都問點解嘅，好多女仔23、4歲已經做媽媽，其實都好適合，我覺得佢可能知道我乜都係全情，所以我覺得佢想我全情做多啲嘢，畀多啲愛大家，可能第時我生小朋友，我就全情畀啲愛我小朋友。」
擁抱輕熟年紀
快將35歲的Fiona，對年齡忽然豁達，不在意變熟女，反而擁抱這個年紀，覺得長大只是猶如為一幅畫加層次，「去到撒嬌時，女人永遠有少女一面，例如男人去到幾廿歲都鍾意打機、講無聊嘢，永遠都有個孩子喺入面。」要肩負照顧家人重任的她，笑說：「我一半係man，一半係woman，裏面有個girl。」
內心漸強，新歌向外界傳遞的訊息、曲風亦增強，「人生第一隻plug嘅歌《麥當娜一吻》講我係一個細路女，入到嚟做嘢嘅世界，有好多恐懼，好需要一個人畀我目標同支持。我覺得麥當娜（Madonna）係好強、好知道自己想點嘅一個人，想佢給我力量。」現在輪到成長了的Fiona，「𠵱家可以做人哋嘅麥當娜咁，唔係話我同佢比較，只不過好似當年咁，我可以俾人哋一個能量啦，發放啲正能量、愛。」總之，時刻做自己。
首支饒舌歌挑戰高難度的廣東話，結果花了3日在錄音室尋找夠真我的聲音。沒有最難，只有更難，她還負膝頭舊患排舞45小時，再通宵直落在茶樓拍MV，「行路、落斜都好痛，夜晚貼去濕膏，平時噴防發炎嘅嘢，一排完就敷冰，排舞戴護膝，入面又用運動員嗰啲貼紙，睇咗好多個醫生，照MRI，不斷祈禱。」最後憑超強信念，以及上天眷顧完成任務，「喺咁多個醫生中，俾我搵到個少少物理學治療，少少氣功咁，膝頭好過排舞之前。」
化妝都要改
「一部電腦要upgrade個software，個screensaver俾人睇到都應該係唔同。」Fiona認為無進步就是退步，蛻變由內至外，「呢排唔太想黐假眼睫毛，黐咗隻眼會好圓，我本身隻眼都偏圓，呢排我sell緊嘅歌係有自己嘅態度，咁我覺得嗰排眼睫毛令我好冇態度，佢令我個樣比較cute。一黐咗就少咗睇眼珠，唔黐會突出啲，每個女仔眼神都好靚。」
更多精采時尚內容，盡在 http://add.appledaily.com 。