中環擺花街嘅名人業主一籮籮，包括謝霆鋒、古巨基、四太梁安琪，仲有名人租客，就係草蜢成員一之蘇志威（蘇老闆）。佢3年前開始每個月掟25萬元，租擺花街15號地下連地庫，面積共1,400呎，賣男士禮服品牌Luxe Tuxedo，4年租約，原定明年4月到期，家陣業主就將舖位放租，唔通蘇老闆棄租唔做？
蘇老闆噚日回應話：「我哋仲傾緊，因為死約完咗，生約仲有，諗緊係咪留守，因為出面店舖嘅租價回落番，如果舊舖價位ok就續租，否則搵出面理想地段，我哋當然想搵最平地方租。」
問到會否買舖位？佢就話「如果有機會，都會投資買舖，免得有麻煩」。不過佢又指，客人係跟牌子買衫，舖位喺邊並非重點。講來講去，蘇老闆應該係想業主減租啫，估唔到跳舞叻，跳草裙舞都勁，不過此乃人之常情。