今年美國總統大選，係歷來最富娛樂性嘅一年，民主黨大熱門候選人希拉莉從政三十幾年，做過八年第一夫人，八年國會參議員，四年國務卿，之後處心積慮部署競選總統，以為會佔盡優勢，點知道民主黨內殺出個老人家75歲嘅桑德士同佢爭提名，仲搶走唔少婦女票源，可謂人算不如天算，雖然桑德士最終都只會係阻頭阻勢嘅角色，幾難拉倒希拉莉墮馬，但已足以令希拉莉失去威風，氣勢。
更難預料嘅係共和黨起初有17人角逐提名，包括參議員、州長、前州長等等政治人物及共和黨元老寄以厚望嘅杰布殊，點知一位局外人，跋扈囂張嘅二流地產商人特朗普突然殺退所有政客，而今剩番佢一人站在擂台上，勢必成為共和黨2016年總統候選人。呢位狂人慣咗口出狂言，侮辱他人唔駛本，鬧外國人如有毒舌，講實質政策就空洞無物，每次只係翻來覆去咁講：「I can negotiate a better deal」（我更識講價），最近佢指中國正在強姦（rape）美國，中國冇乜反應，如果特朗普真係成為總統，佢點樣同「強姦者」講價呢？習近平難道只敢鬧日本，對美國人嘅辱罵就當聽唔到？
有特朗普亂咁噏得出就噏，就有民主黨人群起而攻之，奧巴馬出席白宮記者周年晚會搞棟篤笑，就挖苦特朗普富有外交經驗，見盡不少國家小姐（因特朗普旗下公司主辦世界小姐選美會），之後奧巴馬又話入主白宮不是現場表演（reality show），更不是娛樂事業。特朗普點樣反擊呢，就猛烈攻擊希拉莉嫁咗一位玩弄女性嘅老公，講大話嘅老公克林頓，係非常人身，十分入肉嘅攻擊，實行一箭雙鵰，希望嚇窒克林頓唔好高調露面為老婆助選，其次係窒住希拉莉唔敢再提保護女性。美國總統競選過往雖然罵戰激烈，但絕少涉及謾罵羞辱對手家人，特朗普則出重鎚全無規矩，對主要對手告魯士先指告魯士太太醜樣，後指告魯士父親嫌疑與刺殺甘迺迪總統兇手有關係，罵杰布殊哥哥布殊總統失職，現在指責克林頓好色，只求令對手難堪，不在乎周圍樹敵，他日與希拉莉兩人同台辯論，不知還有甚麼出言不遜的招數。特朗普至今未曾受挫，睇嚟係共和黨選民受落政治八卦，政治娛樂化的一套，亦反映出自2007年次按風暴後，白種人憤憤不平嘅打倒建制派情緒，如狂人特朗普能順利進入白宮，所有美國政治學者都應該燒相書解散政治系。