今日係四川汶川大地震8周年，政務司司長林鄭月娥率領嘅香港代表團噚日就到訪四川臥龍自然保護區嘅中華大熊貓苑，呢個地方喺地震後，獲港府資助逾2億人民幣重建。官員探熊貓，抱抱是常識吧。林鄭噚日有機會親親大熊貓，着住保護衣入園內抱抱，不過唔好睇隻熊貓細細隻，其實份量十足，林鄭一抱住就叫攝影師：「我冇力㗎喇，你哋快啲影相。」場面逗趣。
07年任常秘 隨行訪川
原來被林鄭抱住出場嗰隻大熊貓同香港有啲淵源，林鄭話呢隻叫「冰冰」嘅大熊貓，原來係香港「佳佳」嘅曾孫女。不過拉關係呢招似乎對熊貓冇乜用，林鄭想同冰冰合照時，大熊貓不時左扭右扭，仲趁機跳落地「逃脫」。
其實之前都有兩位做過政務司嘅仁兄去過四川抱熊貓，第一個係人稱肥龍嘅許仕仁，佢2007年率領訪問團參觀臥龍大熊貓研究中心，唔講大家可能冇留意，當年隨行嘅仲有時任民政事務局常任秘書長嘅林鄭；另一個係前特首曾蔭權，佢2010年去四川考察地震災後重建，亦曾到雅安抱熊貓。
有政界口痕友同八方講，許、曾二人抱過熊貓，結果兩人先後俾廉政公署查，肥龍仲罪成入獄，至於煲呔就喺任期尾受醜聞纏身，唔只俾廉署告，仲一度連搵間屋住都搵唔到，認真唔「老利」喎。不過睇林鄭抱得咁開心，就知佢唔信邪啦！
李八方
mailto:[email protected]