恒指周三曾經跌超過200點，喺20000點爭扎，有風雨欲來嘅感覺，一旦打爆20000點，恐防跌勢會加劇，之不過，強股、優質股逆市升，升跌股份數目都係600隻多啲，整體又唔似跌市，究竟係沽貨嘅人蠢，還是買強勢股嘅人將會瀨嘢？搞到身邊唔少戰友都話：「媽，我好亂呀。」
至於小弟嘅諗法係，唔睇恒指，純粹以升跌股份比例嚟睇，就會覺得大市係個別發展，唔會驚到腳震，而股份升跌比例更加係連續三日上升，呢兩日唔當跌市看待。
呢種環境令好多人唔敢買、唔敢揸，唔少科網股、手機設備股等較優質板塊逆市上升，某程度反映聰明錢唔怕指數跌，如啲錢係純粹避險先令股價逆市升，掉番轉市升嘅時候自然會捱沽。不過，噚日升嘅唔少係優質股，所以小弟偏向相信，如恒指止跌回升，呢批強股分分鐘衝得再勁，唔等人。
強到冇朋友嘅當然有舜宇光學（2382），佢手執華為、小米、蘋果等大客之餘，重點係華為進軍海外嘅高檔P9手機，配以Leica雙鏡頭當然係地球上名牌中嘅名牌，呢批鏡頭竟然係由舜宇生產，你話佢唔係地上最強都唔得。當你以為中國手機山寨，舜宇呢批設備供應商只係喺中國境內塘水滾塘魚，其實早已跟埋華為一齊衝去歐美打天下，可見將來唔愁增長，車載鏡頭一樣賺到笑，呢個價買佢競爭力都冇得輸。
晉佳
http://www.facebook.com/advanceguy1