女見習生蔣嘉琦雖然已變為7磅女，但仍然不減魅力，每次報名表一出，均成為搶手貨。今個禮拜六（14日）高伯新馬房的泥地勁旅「你好馬」，向來是小鮮肉史卓豐的慣性座騎，不過為了減輕負磅，增加勝算，今次飛起小鮮肉，卜定嘉琦BB執韁，無非想爭取勝利。
賭后何超瓊愛駒「你好馬」將出戰周末四班泥地1650米，此駒大前仗在史卓豐胯下大勝三個馬位開齋，賽後高伯新激讚騎者的發揮，但接住兩仗續配史卓豐，只獲一亞一殿未再捷。可能高伯新有感「你好馬」目前評分冇乜著數，搏極得個近字，所以今次決定用嘉琦BB，可由132減至125磅出擊，均速馬勢必跑得更輕鬆。
除咗「你好馬」，嘉琦BB禮拜六暫時仲卜到「好友心」、「旅遊首席」、「海嵐一號」等馬，其中文家良隻「好友心」上仗在嘉琦胯下贏馬，人馬合拍，文家良提過此馬利跑變化地，如果禮拜六當日落雨，有權再下一城。