占美華迪紅透英國，唔單止佢啲李斯特城波衫受歡迎，就連佢件英格蘭波衫都好好賣。據英國體育用品零售商Sports Direct嘅數據，華迪件衫仲好賣過朗尼同哈利卡尼，成為英格蘭國家隊嘅人氣王。
Sports Direct係英國最大嘅體育用品零售商，有得賣英格蘭國家隊波衫，同埋阿仙奴及曼聯呢啲大會嘅球衣。佢哋日前公佈，喺一班英格蘭國腳當中，華迪件衫最多人買，排名英軍球衣榜第一位，排第二嘅都有啲令人意外，就係踢緊熱刺嘅中場新星迪利阿里。儘管朗尼今季狀態唔好，但話晒成名多年，又係隊長，都有第三位，至於排緊英超射手榜首嘅卡尼就排第四。
搞足球學校撐業餘兵
雖然華迪紅咗，但出身業餘聯賽嘅佢冇忘本，喺禮拜一開記者會，正式成立V9足球學校，佢希望發掘更多有潛質嘅業餘球員，「我係錫周三青訓，但佢哋話我唔夠大隻，踢咗我出嚟，嗰陣我好懷疑自己嘅能力。我覺得球會唔應該咁快踢走小球員，應該一直培訓佢哋到較成熟嘅年紀。」V9足球學校會喺今年暑假招募第一批業餘球員，等佢哋接受最高水平嘅訓練。
華迪仲提到今夏冇諗過離開李城，好想幫球隊踢歐聯，「好開心李城有今時今日嘅成績，我唔差在講多次，我肯定留隊。我哋成隊波就好似兄弟班咁，大家唔係訓練完就放工講再見、各自走人，我哋會成日見面同傾偈，成班人出街食飯。我認為更衣室關係融洽係我哋成功嘅主要原因。」
英軍名單流出有梳爾？
另外，網上流傳一份聲稱為英格蘭國家隊出戰今夏歐國盃嘅大軍名單，華迪當然有份啦，佢同朗尼、卡尼同埋史杜列治入選，而啱啱傷咗嘅韋碧克就冇份。不過，英足總透過twitter話呢份係假名單，叫大家唔好信。我求大俠亦覺得假假地，例如曼聯嘅勞基梳爾到家陣都未復出，真係唔覺得英軍會選佢入伍。