賣殼概念股接連插水，其中，鱷魚恤（122）之前連插兩日，周二先反彈3.8%，市場似乎驚緊條水走唔到落嚟香港，令鱷魚恤有機會賣殼不成。呢個好明顯係大陸仍然閂閘嘅現象之一，而一日中央繼續防走資，資金升市肯定唔會再出現，取而代之，中長期大概會喺一個冇危機衰退價至有危機衰退價之間游走。
呢一刻，可以話介乎喺中游位置，論人恐懼、我貪婪嘅撈底價又遠遠未到，所以另一個入市嘅劇本係等大市初見回穩再吸貨，等港股連續3日回穩，配合埋人民幣滙價轉強，就係升市正貨，提防假突破。單睇人民幣滙價近期走弱，呢一刻港股回升條件未充足，策略上係盡量mon實，盡早確認短線轉強，就可以快手買入一批原先已備忘嘅好股。
經濟唔好之時，反而可以睇清楚上市公司如何裝備自己，如何轉型，去搵新出路，長線好股永遠喺呢啲時間現真身。唔使多，研究十隻八隻好股已經夠使，再從中選擇同自己夾嘅股嚟買。最近華潤同中信入股嘅鳳凰醫療（1515），之前炒到接近13元係威係勢，驚死追唔切，但需知道華潤系股份向來不易駕馭，趁跌買往往好過狗衝，能夠調整至炒作中信入股前嘅10.5元至11元係密集支持區，不失為機會，有見及華潤加中信後台夠厚，預計股價夠硬淨，衰極有譜。
晉佳
https://www.facebook.com/advanceguy1/