特首跑馬仔下年就係，有人已經喺閘外熱身，甚至暗地招兵買馬。之不過，要入閘先要經過1,200人小圈子選委會呢一關。
約有24萬選民
政府之前已刊憲，選委會選舉會喺12月11日舉行，而本月初選民登記嘅人數直接影響到選委會選民基礎，選舉事務處噚日向立法會提交文件，關於選委會選舉實務安排，就話𠵱家約有24萬選民，相信剛過去嘅選民登記後，合資格人士仲會增加。
泛民銳意搶攻選委會專業界別，選民基礎越大，對佢哋嚟講就越有利，嗱！前題係唔會有人種票喎。
選舉事務處預計提名期由11月8日至14日，其實安排同之前幾次大同小異，38個分組之中，有3個唔使選，其餘35個組別合共會產生1,034席。
之前立法會政制事務委員會都有講過，話香港嘅選舉投票時間太長，不過政府都係意見接受，檢討完安排照舊，今次選委會選舉投票時間都係上午7時半到晚上10時半，之不過有名你叫小圈子選舉，大部份公司票、團體票，候選人連拉票都慳番就印印腳當選，投票時間長啲都冇所謂啦。