菲律賓總統大選塵埃落定，有「菲律賓特朗普」之稱嘅達沃市長杜特爾特（Rodrigo Duterte）篤定當選。經民聯議員張華峰話，佢唔止真係見過杜特爾特，仲識得佢，家陣杜特爾特準備做總統，佢有條好橋畀杜特爾特咁話。
本身係菲律賓華僑嘅張華峰話，佢同杜特爾特又唔稱得上係熟，不過佢啲親戚同杜特爾特都係來自同一個省，所以見過吓面咁囉。家陣杜特爾特準備做總統，張華峰就一邊同八方呻，一邊度咗條好橋畀杜特爾特。佢話菲律賓作為有成億人嘅國家，但首都馬尼拉都冇地鐵，既然內地講緊一帶一路，杜特爾特可以同中國傾吓，搵中國幫佢起番條鐵。張華峰真係關照自己家鄉，搵祖國幫家鄉起鐵，不過呢條鐵掂唔掂，八方真係識條鐵咩！