黎明入行30周年個唱，成功化解公關危機，敢於認錯、努力拆解問題嘅能力、唱功亦好過之前，睇得出黎明做事有幾咁認真，難怪得到唔少港人欣賞，就連黎明嘅金句都被昇華去到哲學層面!
高登巴打連日都為黎明開post，比較「四大天王」張學友、黎明、劉德華及郭富城，當中劉華嘅fans同黎明fans最多火花，感覺就好似去返90年代fans互罵嘅情況。
雖然外界一直講「香港樂壇已死」，之但係o依家一個「黎明」，再次引起大家關心香港樂壇「接班人」嘅問題，今日就有巴打開po問「大家記得許志安同黎明係同一屆新秀嗎」，係噃!如果大家仲有啲記憶，可能會記得佢哋喺1986年參加第五屆新秀歌唱大賽，許志安拎咗銀獎，而黎明拎咗銅獎，講講吓仲回顧番「天王」讓路畀新人嘅經過……
有人就覺得如果黎明喺1999年個唱尾場宣佈唔再拎獎，樂壇啲新人好難上位，話晒當年無綫《勁歌》頒獎禮「金曲金獎」，回顧歷年紀錄，張學友和黎明分別四次稱冠等(新聞連結： http://bit.ly/1XiASCZ )，因為大王讓路，後生嘅歌手先有機會，許志安、李克勤、陳奕迅、謝霆鋒、梁漢文、古巨基，即係好似譚校長同哥哥張國榮唔玩拎獎，跟手到四大年代，玩到1999年由黎明首先宣佈唔再拎獎、學友喺2000年於「叱咤樂壇」拎我最喜愛男歌手，佢就話：「有個朋友同佢講你老喇，仲同啲後生仔爭，收檔啦……希望新嘅世紀裡面，好歌有好報。」之後學友開始淡出頒獎禮，得番城城同一班後輩鬥，其後一班後生歌手先有機會彈起。唉!唔知香港樂壇幾時先有新氣象!?
另有網民講起黎明入行咁耐，咁今年都係許志安入行30年噃，網民更問大家記唔記得許志安喺高峰時期，2001年拎十大勁歌金曲最受歡迎男歌手，當時佢對Sammi(鄭秀文)講咗「廚房宣言」，Sammi為佢喺台下喊咗出嚟，安仔等咗個獎15年。