日本財相麻生太郎講話明顯有份量得多，一開口，已經嚇到日圓腳軟。
貴為日本央行行長，黑田東彥一早衰過「狼來了」，在3月負利率前一周，仍一邊強調從來無考慮用負利率，轉頭就已經出手，顯示他可能有「戲子潛質」，所以他近期不斷恐嚇干預、干預、再干預，市場一於好少理！
以古鑑今，回帶一下，日本政府何時出手干預日圓，就會發現，日本政府目前應該是「靠嚇」。日圓自2008年後經歷瘋狂升值，但實質干預次數少之又少，外電有透露，日本對上一次干預已經是2011年日本大地震，引發海嘯，當地經濟、人命一浪帶過，政府及各大企業從海外大量贖回資產，搬錢回日本救國，但2012年日圓高見「10算」，現在？明顯未到干預時機。
2008年金融危機、2010年歐債、2013年意大利大選令歐洲動盪等，日圓都成為投資者眼中的避風塘，6月絕對稱得上是多事之「夏」，故日圓避風港的功用應該會維持至下月，即日圓可能跌極有限，下月發生乜事，無人估到，所以，保險啲計，Yen可以分批唱下。
除非你想博日本下月放水或美元加息，就另當別論了。
Melody
本欄逢周三刊出