長和計劃拍戲，戲名叫《司徒大佬》！大家冷靜啲，呢間長和唔係超人嗰間，而係長和國際（009）。長和國際噚日宣佈，旗下東方電影與深圳製作公司「龍創藝」有意合作拍戲，budget係3,500萬元人仔。戲名叫做《司徒大佬》，係咪霸氣外露呢?
睇番龍創藝往績，多數做動畫長片（1萬分鐘以上），亦做大型3D網絡遊戲美術製作、遊戲高精度CG宣傳製作等等。公司由前期設定部（度橋），到建模、動畫、合成部、剪接、特效等全部一腳踢。
2014年出品《爸爸去哪兒》動畫版、仲有原創嘅《繽紛小鎮》，聽聞都高收視嘅。長和通告冇講明新製作呢齣《司徒大佬》係乜類型，唔知係咪卡通江湖大佬片嘞。
長和國際前身係電影人黃百鳴創立嘅中國東方實業，2008年賣盤，改名長和國際，成日被人笑佢叨超人光。卒之今年3月，股東通過改名做「九號運通」。