正當大家仲講緊西甲爭標、歐聯爭標嗰陣，德甲盟主拜仁慕尼黑已經快人一步，搞緊下季組軍，佢哋噚日喺一個鐘內連續宣佈兩單重鎊收購，分別買入賓菲加中場新星連拿度辛捷士同埋多蒙特嘅德國中堅曉姆斯。德國《圖片報》披露，27歲嘅曉姆斯嘅轉會費約3,800萬歐元（約3.4億港元），係拜仁近四年來簽入嘅第三位多蒙特球員，喺2013年拜仁先收購馬里奧葛斯，翌年再簽羅拔利雲度夫斯基。至於18歲嘅辛捷士身價3,500萬歐元，佢同曉姆斯一樣都係同拜仁簽約到2021年。