市場有人唱好，有人唱淡，如曾在市場打滾，就知道唱好容易唱淡難，如非信心十足，焉敢唱淡。某位分析師，姑且叫佢做A君，屬新進一代分析師，自2014年下半年開始，就唔睇好人民幣，在公司內部會議「唱淡」。A君上司頂佢唔順，一日靜靜雞捉佢去星巴克飲咖啡，在人聲嘈雜嘅環境，同A君耳語：「唔好唱淡啦，公司推緊人民幣產品呀，你開會時講完，班前線人員立即窒咗，唔敢大力推產品，你教我地點交數？」A君為之默然，但呢位飽受美帝大學教育嘅仁兄死撐：「睇數據，結合理論，人民幣係會跌噃，我唱好人民幣即是背棄自己所學。」上司答：「咁你以後禁足，唔准陪前線人員見客。」
唔見咪唔見囉，但A君亦同時收到命令，不准在媒體出鏡。後來佢同左丁山食飯，透露此事，左丁山問：「做呢行都冇言論自由？」A君話：「係冇㗎嘞，我畢業後幾年，返香港之前，在華爾街大行做過，大行分析師亦係唱好多過淡。經紀推銷股票，憑著名分析師嘅推薦買入報告，容易做到生意，所有人客嘅心理都係傾向買入持有，多過借股票沽空，沽空之人，膽識多數大啲，近乎職業炒家，我地啲經紀未必夠呢班人叻。另一方面，又要照顧到與目標公司嘅長遠關係，分析師醒目過人，自動自覺都係喜歡寫唱好報告嘅，唱淡幾乞人憎之外，而且未必幫公司搵到生意，容易食炒魷魚㗎。」
既然係咁，為公司荷包，為自己職位，都要寫唱好報告啦，為何要唱淡人民幣？A君話：「數據咁清楚，除非冇讀過經濟學或者百分百違心嘅啫，對人民幣點樣可以唱好呀？我咪最多匿埋喺銀行，唔出街見客囉。」現實世界就是如此，制約條件多，唔到你話清高就清高。最能夠獨立思考，寫報告唔駛考慮多多嘅，應該係大學教授，可惜吖，又係中國古老講法，學而優則仕，有人靜待機會，等「相公厚我」，於是乎寫理論文章少不免較為飄忽一點。知道呢啲情況，左丁山對國泰君安首席經濟師身在內地，所知國情甚詳，居然還敢唱淡以至收到警告或勸喻，感到幾意外，亦佩服呢位林女士嘅勇氣！香港有名氣嘅CLSA數年前被中信證券收購，中文名改做「中信里昂」，上星期五出報告話中國內債如爆煲，有一萬億美元以上會在空氣中消失，誰人付鈔？內地銀行囉。中信里昂噃，唔係以前嘅法國里昂噃，喺香港公然唱衰內地債，證明一國兩制仲係有用！