受廢青熱捧的毛記電視為慶祝一周年，將於今晚假會展舉行「萬千呃Like賀台慶2016」，「腦細」林日曦連日在facebook貼主播綵排相呃like，前日就「出賣」銀紙彤、盤菜瑩子、唐詩勁、佘驚曼、黃慘盈的素顏排舞相，他更抵死留言：「仲有兩日，核核突突」，網友取笑她們：「壯腿少女系列」、「盤菜變咗梅菜，好樣衰呀！」昨日腦細再貼Dickson等的綵排相，及一張「最like男、女主角」和「最like節目」獎座相。
另外，腦細於上周四貼出跟俞琤、林海峰、彭浩翔合照，並留言：「相見無事，純粹壽司」，昨日腦細被問到是否請三人做頒獎嘉賓？他說：「冇乜特別，純粹食飯，會唔會亮相台慶？就唔知呢，我諗亮相，主要佢哋喺屋企睇電視直播囉。」
邀殿堂級嘉賓
至於台慶有甚麼嘉賓？腦細保持神秘：「大家估啦，有一個唱歌非常之好聽嘅男歌手，殿堂級嘅，同Eason（陳奕迅）係同grade，一樣咁好聽嘅男歌手會嚟同大家唱現場。」
問到台慶有甚麼大搞作？至like男、女主角走勢如何？腦細說：「都係做埋啲國際慣例嘢，亮吓燈、亡命呀表演呀、抽吓車、唱吓歌、跳吓舞，重頭節目就係掟壽包。獎項走勢方面就好難透露，主要睇番邊個平時擦鞋擦得勁囉，擦鞋得勁嗰個就冇獎，好核突㗎嘛擦鞋。」
利君牙有後台
之前腦細表示睇好羅若off做女主角，至於另一候選人利君牙幸好獲毛記另一位老闆男友阿Bu（姚家豪）撐，阿Bu被問到是否投女友一票？他在電話說：「我梗係支持啦，心裏面投佢一票。」
此外，除核心內圍有騷睇外，核心外圍都有紀念品買，包括「四大天王」公仔，分別有劉德華、台慶別注郭富城（羅友有桃）、純白別注張學友及純黑別注明福俠。
採訪：皓騫