好多家族企業嘅二、三代已經加入公司幫手，唔少選擇低調，唔多公開露面，鷹君（041）主席羅嘉瑞嘅長子羅俊謙（Alex）就係其中之一。
今年31歲嘅Alex，大約3年幾前返鷹君幫手，之前做過投行，2013年鷹君分拆朗廷酒店（1270）上市，佢都有幫手。
佢唔願見人，好在羅嘉瑞肯講吓寶貝仔。佢噚日喺股東會後透露，Alex主要負責建築項目，有時都會跟其他海外project，可以話係乜都要做。
問到Alex係咪已經學滿師，可以獨當一面接班，羅嘉瑞即刻笑住咁話，冇咁快，仲要繼續學嘢。佢謙稱，自己都仍然係邊學邊做。
見到羅嘉瑞，當然又會諗起佢係「創業板之父」，當年創業板原意為初創企業集資，今時今日卻變成啤殼樂園。問佢創業板應該點樣改革，佢簡單回應話，監管部門應該「睇睇個規格」，可能佢都冇眼睇了。