新鮮出爐英冠冠軍般尼,佢哋嘅球員喺星期一終獲頒冠軍獎盃同獎牌,點知當選為般尼本季最佳球員嘅中場祖爾巴頓竟然冇牌!其實,般尼係應該喺上周六英冠煞科戰作客勝查爾頓時捧盃嘅,但英冠有條例話冠軍隊唔可以喺客場捧盃,所以星期一先正式進行頒獎禮;而賽會同般尼講只會有25塊獎牌,但般尼就叫咗27個球員去。去到最後得番一塊牌時,賽會職員堅持要畀湯希頓,因為佢係隊長,咁所以巴頓同埋後衞達高斯基就冇牌攞,好彩有關方面從善如流,冇釀成「關公」災難,巴頓同達高斯基之後都補攞番獎牌。