大家仲記唔記得，大約兩年前，濠賭股十分好景，銀娛（027）股價越升越有，帶挈銀娛老闆呂志和曾經成為亞洲首富，不過此一時彼一時，阿爺反貪腐，拖累濠賭業，銀娛股價如食瀉藥，由2014年高位唔見7成。銀娛噚日舉行股東會，幾位小股東都呻話蝕得好甘呀，好彩佢哋尚算理性，冇拉住呂志和叫佢回水。
「冇錢溝貨 焗住擺喺度」
好似吳女士咁，47蚊買銀娛，以噚日收市價計，賬面蝕48%，「坐艇坐到唔睇喇」咁話。不過吳女士買銀娛，竟然又冇去過澳門，只係聽朋友講話買，諗住賺啲茶錢。點知升到高位唔識走，家陣跌幾多都冇錢溝貨，擺住喺度先，「鬼叫洗濕個頭咩」！
另一位小股東鄭女士就間中過大海賭兩手，見證濠賭業興衰。佢話，以前500蚊賭一鋪，𠵱家100、200蚊就得。佢都係用40幾蚊買銀娛，講講吓諗起傷心事，「唉」一聲自爆「我都有隻澳博（880）呀，跌得好慘呀」，不過佢又好積極喎，諗住銀娛由廿幾蚊，跌到10零蚊，再入場撈貨。
雖然係蝕得甘，不過銀娛小股東都算冷靜，股東會未變哭訴大會。主席呂志和會後亦派定心丸。呂志和認為，年初至今，賭收已經冇跌得咁勁，仲平穩落嚟㖭，「可以講係到底」（其實佢話見底好耐）。
佢指，今日個個賭場都唔只開賭咁單一，加入好多其他玩樂元素，中澳政府目標一致，就係將澳門發展成旅遊會議中心。就算最近睇實咗貴賓廳，呂志和認為，雖然呢招係辣，但透明啲，對行業發展係好事。
小股東心聲
呂志和拒表態撐CY連任
呂志和早排曾經高調撐過梁振英，籲市民「同情、擁護」一男子，但噚日一被問到支唔支持「CY連任」，竟然話唔識答。佢話，慢慢會睇得到，「亂講嘢唔好，政局大家少出聲，等佢做（任其發展）」。
唔通上次撐完人哋之後，呂志和被人封嘴？佢即刻笑笑口咁話「嗱，唔好咁講呀，你又唔好加嘢落去至得㗎，大佬！」佢指，香港係福地，大家都係專心做生意，搞好經濟。話𠵱家啲雜音太多，成日講政治，講到尾仲語重心長咁「唉」一聲㖭。
李華華
mailto:[email protected]