【ViuTV風雲】虔誠基督徒高皓正（高主教）和出櫃何韻詩同應邀參加ViuTV真人騷《跟住矛盾去旅行》，前晚和昨晚播出兩人出發到人民公投立法同性婚姻合法化的愛爾蘭，他們又談論同性戀和跨性別話題，阿詩重提2012年公開出櫃。
高主教和阿詩曾於03年合作電影《尋找周杰倫》，戲中交代他們在油站廁格gathering，高主教說：「我哋喺廁所搞嘢。」阿詩好大反應：「有啲咁嘅事？我會做啲咁嘅嘢？」節目旁白跳脫，原來是出自「腦細」林日曦，高主教非常佩服，昨日在電話大讚：「最突出表現獎要畀林日曦，我諗唔係寫稿寫畀佢，咁搞笑真係要畀個讚佢。」而該電影中還有阿詩的熱褲露腿造型。
互送高帽
阿詩節目中突然失聲又遺失銀包，高主教樂於為他祈禱，她前晚在fb留言：「我懷疑係高皓正落我降，不過我問佢，佢話冇，我唔信。」高主教昨笑言：「我邊識落降頭，解降我就識，搵耶穌。」
阿詩昨日在本報專欄中提到這個行程後，寫下對高主教的看法：「原來高皓正，撇除他整天要幫我祈禱好鬼煩外，也不過是個很正常的港仔。」高主教也回敬阿詩高帽：「佢唱歌叻，文筆原來仲叻，如果香港人人有阿詩呢份智慧，咁大家就可以化解好多矛盾。」
高主教表示前晚與老婆在家嘆爆谷睇《矛盾》，他說：「我老婆話我都幾靚仔，我都好開心，最緊要呢個point。好開心可以喺呢個公眾平台，探討以前覺得敏感嘅話題。」他表示不介意再跟阿詩結伴出遊，到時他會帶同妻子及一對子女同行。
採訪：劉敏
