民主黨深水埗區議員袁海文，揭發美容公司Dream Beauty Pro涉嫌趁OL幾乎剝光豬時硬銷療程，除咗令呢間公司「知名度」大升，亦令乳鴿袁海文廣為女人認識，成為一眾OL嘅美容求助專員。袁海文同女人特別投緣，最近喺區內搞嘅Gel甲班一開即爆，嚟緊兩班亦告滿額。
男拔畢業嘅袁海文，去年喺「西九四小龍」擊敗在任嘅經民聯區議員李祺逢，袁海文有日喺街上搞流動辦事處，遭美容公司硬銷嘅女苦主向佢求助，力陳自己點樣俾人強迫銷售，呢個求助個案就展開袁海文嘅「美容專員」生涯。佢話件事一出街，迴響甚大，陸續有幫襯同一間美容公司嘅苦主前來向佢伸冤。
搞美容黑店投訴平台
涉事公司Dream Beauty Pro嘅CEO以不具名方式喺網上向袁海文還擊，不滿佢抹黑，但袁海文定過抬油，仲話該黨稍後會搞個「美容黑店投訴平台」，應付大量投訴。
立足中產區，點可能派蛇齋餅糭咁庸俗？袁海文早前喺區內搞50蚊嘅Gel甲班，請朋友嚟教，點知一開即爆，嚟緊多搞兩班，同樣爆滿，有學員更是母女檔嚟上堂。
除為女士伸寃，佢仲敢向發展商挑機，去年選舉時，佢不滿麗新發展嘅長沙灣廣場只係畀對手賣廣告，於是向政府投訴。政府早前已向麗新發展發出警告信，斥麗新違反選舉規例同指引，麗新話事人係林建岳，亦都係經民聯監事會主席，唔怪之得。
李八方
mailto:[email protected]