歐鎧淳噚日帶住大馬泳賽五金同隊友返港嗰陣，笑容由心出發。因為佢喺100米背嘅主項造出個人最佳時間兼港績1分00秒48，仲要因為當地設備差，連跳板都冇，距離里奧A標只係差0.23秒。呢位美人魚話：「目前游出呢個時間後，可以放鬆去衝A標，如果有跳板加狀態好，絕對有機會。」周六佢會參加體院D1長池賽，嘗試挑戰劉彥恩喺上月造出2分10秒99嘅200米背香港紀錄，月底會去東京衝100米背A標。