歐洲五大聯賽剩番西甲仲未決出冠軍，經過周日尾二一輪聯賽後，三頭馬車先有馬德里體育會下馬，周六煞科戰剩番巴塞隆拿同皇家馬德里爭標。雖然皇馬只係落後巴塞一分，但睇足智彩巴塞奪標賠率熱到1.02倍，就知要阻止佢哋蟬聯有幾難。巴塞喺周六煞科戰嘅對手係CF格蘭納達，後者啱啱宣告成功護級唔使再搶分，連個天都幫埋巴塞。
巴塞封王熱到1.02倍
巴塞上月中輸畀華倫西亞之後，被馬體會同皇馬追到相差一、兩分，但之後及時發力，到周日加泰隆尼亞打吡主場迎戰愛斯賓奴，「MSN」美斯、蘇亞雷斯同尼馬各有入球下以5:0大勝，聯賽四連勝一共入21球冇失過波，再取三分續居榜首。至於馬體會作客已經降班嘅利雲特就算先入波，最後都爆冷輸1:2，由於落後巴塞三分下輸對賽成績，率先宣告無緣爭標。至於皇馬就憑基斯坦奴朗拿度梅開二度，加上傷癒復出嘅賓施馬建功，主場3:2險勝華倫西亞升上第二，繼續落後巴塞一分，但要後上封王，除咗要喺煞科戰贏波，亦要寄望奪標賠率只係得1.02倍嘅巴塞失分，好難囉。
拉科要「報恩」皇馬惡踢
巴塞喺西甲煞科戰將會作客CF格蘭納達，雙方實力差距大就唔在講，對皇馬嚟講最慘係格蘭納達喺周日拎咗關鍵三分，爆冷作客大勝西維爾，亦確定成功護級，下場可以大踢風流波。皇馬煞科戰都係作客出擊，對手拉科魯尼亞雖然同樣不愁降班，但鬥志或者完全唔同！陰謀論睇巴塞係拉科「恩人」，後者上季成功護級，就係靠巴塞喺煞科戰留手送一分畀佢哋；上月巴塞三連敗之後，正正係大炒拉科8:0結束頹勢，所以到周日迎戰皇馬，拉科隨時搏晒老命。
巴塞教練安歷基賽後話，球隊仲領先緊係實至名歸，但煞科戰未必食硬：「格蘭納達護級成功又如何？你睇下馬體會對住已經降班嘅利雲特賽果係點。」皇馬主帥施丹就話：「足球世界有無限可能，我哋會戰鬥到最後一分一秒。」
