今年耀才證券（1428）嚟咗一位新管理層，就係永亨銀行前司庫黃健財（Raymond），去到耀才擔任高級顧問一職。要點樣介紹Raymond好？好簡單，佢喺永亨打工超過40年，由低做起，係一位經歷咗永亨四個朝代嘅老臣子。
一份工打足半世，心諗長情兼利害，但Raymond話，遇上心水清嘅叻人反而會問佢：「你一份工做四十幾年，你一定好捱得鬧啦？」原來呢個先係做到幾朝元老嘅秘訣。
Raymond再加多句：「無論（管理層）點樣轉，間公司都要有人做嘢嘛。」即係一位高層要喺公司屹立不倒，就又要鬧得，又要做得喇。
耀才近年都算發展得快。Raymond以前喺永亨見慣大客，今次嚟到希望可以幫耀才湊大一班能夠服侍大客嘅員工。以Raymond嘅經驗，睇嚟葉生今次搵啱人。