「萬人迷」碧咸又有新消息，佢老友樂裕民（Bruce Rockowitz）做行政總裁嘅利標（787）最新宣佈，旗下Seven Global與男士護膚品牌Biotherm Homme合作，由碧咸擔任代言人，而雙方合作研發嘅新產品最快明年有得賣。
Seven Global係利標、碧咸，以及英國商人Simon Fuller合資成立嘅公司，舊年啱啱開業，講明要「消費」碧咸呢個全世界都識嘅名牌。今次同Biotherm合作，雙方會研發男士護膚、日常護理系列產品，第一輯廣告最快下個月有得睇。
查實碧咸以前都試過推出自家「碧咸香水」，但反應麻麻，唔知今次同大公司合作，會唔會擦出火花。利標舊年9月亦宣佈，搵咗碧咸同英國名牌男裝Kent & Curwen合作。