【本報訊】屯門私樓跌價四成，區內單幢盤麗寶大廈低層A室成交價僅170萬元，成市場焦點。買家是一名姓趙活躍屯門樓市七年的女資深投資者，她主動聯絡本報澄清單位平價之謎及「劈價真相」。
指廁所天花剝落
原來，該屯門私樓僅售170萬元是另有原因。她表示，受樓上A室廁所漏鹹水最少半年影響，導致其買入單位的廁所天花出現嚴重剝落，並外露鋼筋，形容似危樓。「我老公開頭都話，吓，係唔係危樓嚟㗎。睇見啲相都驚，好嚇人㗎，我哋都考慮咗一段時間」。
她在買入單位前沒有睇過現樓，只是經中原地產睇相，「開頭唔買㗎，經紀打來話業主要188萬，我話好核突爛晒，188萬唔會要囉，之後減到180萬，我先生都擰頭，都話唔要」。之後中原地產代理再力銷單位，話業主減到175萬元，最後鋤多幾萬，170萬元成交，業主不想煩才平賣。「就係咁，真係唔想要㗎，唔想煩嘛，咁漏法唔知搞唔搞得掂，仲要滴鹹水喎，我唔係見佢呢個價都唔博啦，叫做買個大細」。據悉，單位廁所漏水一事，地政總署已跟進中。
主動澄清 指不想累街坊
而她今次是換貨，她本身在麗寶大廈持有中層D室。因為見今次買入單位平，與先生商量後，決定換貨，先買後賣。上月中買入低層A室後，即時放售在三年前以162萬元買入的中層D室，因低層A室已簽大定（已付10%定金），所以中層D室一定要盡快賣，因為要向銀行搞按揭，大概一星期內賣出，成交價198萬元，比市價約220萬元低約一成。
她主動澄清單位平價原因，是因為不想累街坊，加上她身邊朋友及家人在同區亦有物業，不想因為一單成交而拖冧同區樓價。