王祖藍同李亞男呢兩公婆工作都好忙，之但係佢哋都成日爭取時間見面，不時喺微博貼撐枱腳嘅相，最近佢哋一齊去咗馬爾代夫，為多對新人婚禮擔任證婚人，以「過來人」身份送上衷心祝福及教愛情保鮮嘅秘訣。
人妻李亞男連日喺Instagram貼出泳衣照，大晒長腿、纖腰，昨日更po出一張同老公仔祖藍嘅合照，二人玩「Titanic(鐵達尼號)」feel，抵死咁由祖藍企喺前面，張開雙手，李亞男從後溫柔，輕攬祖藍，二人相當有趣，難怪相中見李亞男都忍唔住想笑。有網民留言問：「好像站錯位了，哈哈哈，你們好搞笑!」亦有網民寫道：「王祖藍變高了。哈哈哈!」睇番張相，就知「角度嘅重要性」喺邊!?