未到五月，祖雲達斯已經鎖定意甲冠軍，周日作客確定降班嘅榜末球隊維羅納，半力出擊結果輸1:2，連續26場聯賽不敗走勢結束。呢場波亦係前意大利國家隊前鋒東尼嘅告別戰，可以入波兼贏埋祖記，皆大歡喜喇。
月尾就39歲嘅東尼，踢埋今季就會掛靴，仲話唔會喺作客巴勒莫場煞科戰上陣，所以周日迎戰五連冠嘅祖記，就係佢職業生涯嘅告別戰。祖記呢場有保羅普巴等四位主力停賽，又收起門將保方，咁大份賀禮，維羅納梗係唔客氣；東尼喺完半場前射入12碼先開紀錄下，最終以2:1擊敗對手。
東尼曾經喺2006年幫意大利贏世盃，上季亦成為歷來最老嘅意甲神射手；至於年紀更大嘅托迪就仲未言退，39歲嘅佢喺周日羅馬主場3:0大勝基爾禾場波後備入替，累積第600次意甲上陣，仲盛傳即將同羅馬續約一年。