「歡迎各位收聽、收睇《議會內外》，我係劉慧卿。」唔知大家係咪同八方一樣好耐冇聽過呢句開場白呢？原來《議會內外》無聲無息咁結束，卿姐話自從舊年10月訪問過港大校友關注組副召集人吳錦祥後，OurTV就冇再搵過佢，但最令八方失望係卿姐冇得再追亞瑟王李國章欠佢嘅債。
其實唔經唔覺，《議會內外》已經做咗6年半，唔少政圈中人都畀面過卿姐受訪，無論建制派嘅梁愛詩、羅范椒芬、袁國強，泛民嘅何秀蘭、湯家驊，學者鍾庭耀、陳弘毅、馬嶽等，都做過卿姐座上客。
OurTV係由香港2020成員高德禮出錢嘅。卿姐話最初係OurTV接觸佢，想畀個平台民主派發聲，卿姐分文不收答應，一做就做咗咁多年，而幾年嚟，卿姐最深印象就係政改期間政務司司長林鄭受訪，事關當時真係逼爆咗個錄影室。至於另一位卿姐好深印象就係港大校委會主席李國章，因為亞瑟王一直唔應承卿姐邀請，但就講過佢做咗主席後會上卿姐節目，家陣條數怕且冇得追。