香港新一代被標籤為激進搞事，但𠵱家批評嘅一班建制中人，當年唔少人參與六七暴動。民政事務局前局長曾德成係其中一位，哥哥曾鈺成噚日接受商台訪問，憶述當年妹妹及弟弟先後入獄「好淒涼」。
曾鈺成話當年妹妹就讀庇理羅士女子中學，有學姐因政治原因被踢出校，而佢個妹與同學為此事包圍校長理論，校長報警，而涉事嘅曾勵予就被捕入獄一個月。之後就讀聖保羅書院嘅曾德成因喺學校派反港英政府傳單被捕，不過患難見真情，曾鈺成自言事前同弟弟關係唔算和睦，直到對方入獄之後二人才真摰對話，互相安慰。曾鈺成仲話弟弟一向都乖巧、溫柔，從來唔犯校規，點都諗唔到會被捕，事發後親俾街坊閒言閒語，終日以淚洗面，後來更舉家遷到北角。