上周五外圍股市靠穩，周一明明係港股有力反彈嘅時機，點知《人民日報》一篇經濟呈L型走勢，順手搞L低大陸股市，恒指唔跌，但二、三線繼續倒水，近兩日越倒越急，形勢惡化照計未跌完，只能繼續備忘股份繼續等。
合生元（1112）噚日公佈首季營運數據，其中嬰幼兒營養及護理用品收入按年下降12.9%，至8.68億元人民幣；而成人營養及護理用品收入則升48.8%，至6.01億元人民幣，佔總收入四成。即係話，舊年9月先買番嚟嘅Swisse Wellness 83%股權，開始為合生元帶嚟增長貢獻，而隨住成人營養及護理用品業務未來繼續增長，呢部份收入同盈利比重只會越嚟越高。
合生元奶粉業務黃金期可能成為過去，但係新業務就有可能令合生元變番半隻增長股，佢嘅成人營養及護理用品產品可以經過現有奶粉嘅內地銷售網絡去分銷，睇嚟相當有synergy，如果真係由一隻冇增長嘅股，變番一隻增長股，成件事就完全唔同計法，股價潛在升幅可以好大，突破今年高位31.8元難度唔高。同一單收購，亦可睇到合生元嘅海外尋找收購項目嘅能力，以及管理層夠積極去轉型同搵新增長點，轉身亦較一般中資乳業公司更快，質素嘅差異，似乎未足夠反映喺股價之上。
晉佳
https://www.facebook.com/advanceguy1/