今晚的六合彩派彩高達1.5億，全城瘋狂。前六合彩之女周嘉莉昨日到曾於億元六合彩歷史中，誕生兩名頭獎幸運兒的北角馬寶道投注站碰運氣，以200元買了10張電腦飛，她笑說：「我有網上投注戶口，會再買5膽拖全餐，一共440蚊，買半注都係220蚊，如果到時頭獎得半注中就唔好喊，呢個要自己取捨，我記得2014年9月13日，當時嗰期一億彩金係我主持。」
嘉莉選的5個心水號碼分別是7、14、22、24、44，她說：「如果中頭獎，我會捐3成去慈善機構，然後買兩層樓，一間自住，一間畀屋企人，同埋買過百萬dream car，真係中頭獎先買到，餘下嘅錢會投資，仲有開部賽車戲畀自己，因為我未拍過戲，想圓自己演員夢，會預埋亞視班舊同事，因為佢哋好有潛質，又識做戲。」
冬叔買15、16
六合彩之父、現年84歲的夏春秋（冬叔）昨日接受本報訪問，被問到心水號碼時說：「心水？乜嘢心水呀？我個心就15，16，就15、16啦！」至於會否投注？冬叔說：「會買，撞吓彩啦。」而六合彩之子蔡國威亦在facebook提供心水號碼為「24、33」，他還溫馨提示：「有時間就早少少買啦，減少排隊時間嘛。」
採訪：黃曉妍
