曾俊華司長上周話：「若選一支球隊形容香港，我選Leicester City！（李斯特城）」原因係：「李斯特城將不可能變成可能，是我們一直引以為傲的香港本色。」
錯、錯、錯。孫柏文喺好多議題上都非常支持曾司長，佢出年參選的話，我一定會幫佢派街招。不過呢個比喻，我好反對，直情覺得司長唔get香港人嘅feel。
咁香港係乜英超球隊呢？一定係曼聯！曼聯喺英超嘅戰績，喺費格遜領導下，贏嘅嘢之多，都唔使多講。
不過唔係贏咁簡單，曼聯人最睇唔起例如車路士等其他球隊，因為冇曼聯嗰種浪漫。你車路士同大陸有咩分別？又係一班暴發戶用錢買球員。曼聯由佢90年代初嗰群贏少年足總盃嘅球員，即傑司、碧咸、畢特，個個雖來自五湖四海，不過都係飲曼聯奶水大的骨幹。再加一大批其他地方容不下嘅人才，不過來到後先唔知點解好夾咁發揮。最佳例子一定係簡東拿。當個個靠嗰招，曼聯唔使，都可贏到開巷，呢種浪漫就會衍生出一種霸氣。
香港以前咪又係咁。個個都話人民生活水平要上升，要學西方世界，點知，呢到好神奇地唔使靠佢哋啲招數去令生活水平上升，仲要用我哋嘅招數勁過其他人。三料冠軍嗰隻。
𠵱家呢？如果費格遜代表97年前，𠵱家就係雲高爾。曼聯支持者同香港人一樣，都有種深層次不滿。你問個英國甲乙丙丁組球隊球迷：「你支持隊波，年年都會挑戰攞歐冠參賽權，開唔開心呀？」九成九人都會答開心。情況就似啲人同我哋講：「你哋香港回歸後都好成功呀！你哋仲嘈嘈嘈，咁唔滿足嘅！」我哋𠵱家唔滿足係因以前不但贏，仲要贏得好型。Swagger，霸氣，就係97年前後嘅最大分別。
最後，邊個係Moyes？佢冇搞到要打護級戰，不過因同之前嘅霸氣分別太大，所以一定係董建華。香港實在太似曼聯。
孫柏文
獨立股評人
http://facebook.com/shuen
本欄逢周二刊出