禮拜三谷草賽事用A欄，天文台預測或會有狂風雷暴，提防又會在變化地作賽。睇番最近4月13日同一移欄掛牌為好至黏地，故此賽果具參考價值，當晚九場賽事，七場有一至三檔馬上名，而且合共勝出三W，可見內欄優勢仍大，跑法方面，短途仍以前置馬較佳，如「飛霞」、「超好玩」及「光芒再現」都係擺前建功，不過中距離就見到「勝利仔」及「神州魅力」單憑一條直路從後反先之鏡頭，故此中程後追馬亦不能輕視。
今戰列陣馬中，頭場「飛霞」、三場「超好玩」及尾場「光芒再現」上仗正是於4月13日谷A欄賽事贏馬，等番同一移欄再上陣，睇部署有心想添食。另外，第二場「馬主光輝」谷A欄贏過三次之多，場地性能遠超對手，加上黏地有過證明，亦有留意必要。