雖然政務司司長林鄭月娥早前已表明，她卸任後無意選特首，不過正如一名政界中人同八方講，邊個喺呢個時候會認？最近林鄭一反之前做法，不斷接受電視電台專訪，就令好多政界中人覺得，林鄭對選特首屬「口裏說不，身體卻很誠實」。特別係佢日前招待一班嚟自香港社區組織協會小朋友去佢官邸、同埋去賀粵劇名伶白雪仙大壽，唔少政界人士覺得林鄭呢啲動作，係衝住梁振英同曾俊華而來。
先講林鄭喺母親節招待社區組織協會一班嚟自低下層小朋友，去佢山頂白加道官邸聽心聲同要求，班小朋友仲向林鄭送上親自手做嘅康乃馨賀母親節（圖），場面好溫馨感人。有政界中人話，眾所周知社區組織協會係特首梁振英參選時，重要嘅基層支持團體，仲應社區組織協會主任何喜華去深水埗天台見基層市民，但去年何喜華接受訪問，對梁當選後忽視低下層好失望，更公開表明唔會撐CY連任。
何喜華唔再撐CY，呢個時候林鄭就同社區組織協會行埋，呢名政界中人話，呢啲動作難免令人覺得，林鄭想「接收」CY支持者，「再講白啲就係挖CY支持者過自己嗰邊，究竟有乜原因？可以有無限聯想！」
提泛民朋友 劍指財爺
至於林鄭去白雪仙大壽、早排去電台訪問，又主動提大學時代同單仲偕、李永達一齊返大陸認識祖國，有民主黨人同八方分析，鬍鬚曾選特首嘅優勢，在於同泛民有偈傾、係不同界別、例如演藝界有好多朋友，𠵱家林鄭明顯要show畀人睇，鬍鬚曾有嘅優勢佢都有，真係要落場跑下屆特首，佢一定唔輸蝕過CY同鬍鬚曾！
李八方
mailto:[email protected]