人人都有自己鍾愛嘅品牌，買樓都一樣，好似最近再度爆紅嘅黎明，就特別鍾情信置（083）樓，勢估唔到利孝和夫人就愛上名不經傳嘅私募基金「豐泰地產」。噚日豐泰地產旗下銅鑼灣商廈Tower535開幕典禮，年約九旬嘅佢，仍親自到場剪綵祝賀。
豐泰地產早於2002年由朱惠德與李啟耀創辦。聽發展商線人話，利孝和夫人跟豐泰創辦人朱惠德好老友，幾年前，豐泰地產喺銅鑼灣開平道嘅Cubus銀座式商廈開幕，利孝和夫人都有到場剪綵，相當畀面。
唔單只佢，莎莎（178）老闆娘郭羅桂珍都係豐泰地產嘅粉絲，兩位闊太仲真金白銀支持，好似2010年，豐泰地產賣西半山豪宅瑧環，利孝和夫人與莎莎郭氏伉儷都分別買入單位。