立法會去年6月表決政改方案之時，鬧出建制派洩露WhatsApp短訊風波，而疑似洩密者，據聞鍾意着短褲，而呢次嘅主角，亦係短褲狂，由細到大都情迷露玉腿，而身形高大嘅佢，條腿都幾修長㗎，佢咪係九龍東立法會議員謝偉俊（Paul）囉！
自細見慣毒品黑社會
現年59歲嘅阿Paul，不論衣着同言論，一直出位搶爆鏡（大家一定記得佢嘅法律超人look）。原來佢細細個已經好鬼馬，影相時動作多多愛擺「甫士」。阿Paul出世幾個月後，成家人就搬咗入蘇屋邨，當時一家七口住300呎單位，其中一張相，係佢喺屋企門口同家姐、細佬嘅合照，相中最古靈精怪嗰個就係佢，佢笑指當時嗰個手勢係扮緊相機，唔通都鍾意幫人影相？阿Paul一直喺蘇屋邨住到16歲，就到外國讀書，之後家人移民美國。
講返童年嘅屋邨仔生活，佢話最鍾意同鄰居玩「豆槍」，即係將啲白豆放入膠槍扮「子彈」。佢仲話當時條邨都幾雜，「見過毒品、黑社會」，笑言好早已經學識要與不同背景、階層嘅人相處，堅持唔得罪人亦唔畀人踢入會。
吖，有張短褲look嘅相，原來係佢小六時讀聖方濟各英文小學參加童軍嘅造型（雖則係Scout，但就冇彈吓彈吓喎）。點解扮美人挨住架車影相？皆因爸爸係教車師傅，呢架車係佢屋企嘅「搵食車」。