【專題籽：見工大全】
畢業生搵工季節來了！讀十幾廿年書，吸取知識增進自己當然重要，不過去到大學畢業，除小部份人繼續以有涯隨無涯，尋求學術發展，大部份人終歸要搵工、見工、打工。要有好工先要搵工，搵到好工仲要見工。見工面試，博大精深，唔係讀書叻就成功，今日搵來資深獵頭人，再加三大老闆，教新鮮人見工絕招。
Dos
1.乾淨企理，只需保持笑容滿面，唔需要花枝招展、一身行頭，只要整整齊齊就已經最順眼舒服。未叫你不要自己坐低，入房之前先敲門。你以為好簡單，人人都知，結果是人人都唔知。現在的年輕人慣了隨心所欲，往往忽略了這些細節。
2.CV只要一張紙，這個傳聞好像十幾年已經開始，到底是真是假？張慧敏就話，CV只需一張紙，其實是為了僱主可以清晰看到你各種資格、學歷，而另一個潛台詞就是叫你──不要寫太多廢話。不過為了做到一頁紙效果，有人走火入魔，把字體和行距校得細之又細，結果是完全睇唔清，當然第一時間被out。
3.帶備紙和筆，面試時因為緊張，雙手會經常唔知擺喺邊，又舉高又放低又啪手指。張慧敏建議大家帶紙和筆，一來有疑問可以即時記低，提醒自己要問清楚；二來你可預先記低想問的問題，否則可能因太緊張導致腦海一片空白，忘記發問。
4.如果要進行電話面試，請用家居電話。現在的確已經駁通天地線，世界無邊界，處處都收到電話，不過唔怕一萬只怕萬一，就算唔係斷線，忽然有一秒收唔清，都麻煩。另外，進行電話面試時，請坐在電腦屏幕前，看着屏幕裏自己的倒影，會更加專注。
5.多短的工作都要寫上CV，很多人一份工只做了一兩個月，就覺得不要寫CV，覺得會給僱主不好印象。張慧敏就認為多短的工作都要寫，因為這是個機會去告訴僱主你的個性，可能前一份工是重重複複的行政工作，發覺自己完全不適合，所以做一個月就辭職，反而喜歡創意行業，可以天馬行空，就來應徵這份社交媒體編輯。有這樣的實際工作經驗，比說空話更有說服力。
Don’ts
1.別說舊僱主壞話，轉工有種種不同理由，遇到壞上司、衰同事，毫不出奇。不過如果見工時問到你為何轉工，你就緊記不要把滿腔怒火宣之於口，反而一句：「覺得和同事格格不入。」就足夠。因為一來即使你說的全部屬實，都與見這份工無關。二來，新僱主隨時驚你轉頭又講他壞話，對你有壞印象。三來，抱着太多不平見工，也會影響表現。
2.別估話事人，如果見工時要面見幾位僱主，有人喜歡猜測邊位係真正話事人，對這位仁兄的問題回答得特別詳盡、特別用心，其他非話事人的問題就輕輕帶過。這樣做當然大錯特錯，估中估錯，都只會令對方留下壞印象，所以一定要每位僱主都兼顧到，答問題時都要與每個僱主有眼神接觸。
3.唔識就答唔識，當僱主問到一個問題，你唔知道答案，就照直講：「唔清楚。」、「認識唔深。」不要亂問，不要作答案，不要死撐。記着你只係一個剛畢業的大學生，有不足之處是可以理解的。
4.不要亂作目標，很多人聽到僱主問：「你想達成甚麼目標？」就立即好像上了電一樣，覺得是最大發揮機會，之後就開始天花龍鳳，說希望把公司帶到世界100強、希望可以短期內為公司業務翻幾倍、希望自己三年內升上管理層云云，其實見工唔係做戲，真誠才會打動人，張慧敏話，你有目標就講，想生活安定就講生活安定，冇目標就講冇，絕對不要吹水。
5.唔好講政治，見工時，有兩個話題是絕對禁忌。一個是宗教，另一個就是政治。見工最後一條問題，有人夠膽問公司是藍還是黃。第一，科技發達，要查一間公司到底是藍是黃，花些心思時間不會查不到；第二，如果非藍不做或者非黃不做，你應該一早找到答案，不合你意的話，就不如工都不要見，何必為難自己？如果僱主反過來問你，如何是好？你可以反問：「同工作有冇關係？我有回鄉證可以返大陸。」張慧敏話年輕人有時太刻板，不會四両撥千斤，對自己無益。
預告：果籽推出一連三日的專題「見工大全」，明天專題是「見工心理學」，由心出發，傳你面試絕招，減輕緊張感覺，輕鬆應對難題，密切留意。
記者：李聰、容慧心
攝影：陳永威
編輯：陳漢榮
美術：吳子豪