前日唔少人同媽咪慶祝母親節，但彭家麗已經再冇呢個機會，因為彭媽媽前日肺癌病逝，享年76歲。馮仁昭噚日打畀彭家麗，佢話：「係肺癌，知咗3個幾月，噚晚走，都好突然，因為喺母親節走，我特別難過，不過佢走之前都好舒服，冇受好大嘅痛苦。」身為基督徒嘅彭家麗，話彭媽媽走之前一日剛好信咗主，佢話：「我爸爸問可唔可以叫牧師嚟探吓媽咪，同佢做個信主嘅儀式，我爸爸話佢哋相處期間，媽咪有講過佢想信，所以我即刻call咗牧師，同佢做咗個灑水禮。」
不過，彭家麗見唔到媽媽最後一面，令佢好遺憾：「屋企人都見到佢最後一面，有喺佢耳仔邊同佢傾偈，睇住佢走，我係唯一一個睇唔到嘅，因為7號嗰日我陪咗佢成日，我好攰，我哋就諗住輪流留喺醫院，我返屋企瞓咗幾個鐘頭，佢哋打電話畀我，我直情攰到聽唔到。所以媽咪走咗我先接到電話趕去醫院，見唔到佢最後一面。」
全面停工
原本彭家麗今日要拍MV，但目前工作全部暫停，月尾出碟計劃可能要押後。
撰文：馮仁昭
