坎坷過後有騷開的黎明，八場演唱會前晚在歡呼聲下結束，中環海濱核心外圍開場時聚集3,000人，高峯期更達逾萬人逼爆佔中，尾聲時黎明玩facebook直播：「Hi，我哋喺內圍，唔知邊個噚日食龍蝦，呢排天氣好潮濕，你知道太潮濕的話，啲海鮮好易……你明我講乜㗎啦！」可惜卻不停斷線，黎明無奈說：「畀多次機會 唔得就唔勉強。」
可惜live只維持30秒玩完，但截至昨午已有49萬瀏覽。黎明說：「雖然唔可以同核心外圍嘅fans live chat，緣份係唔可以強求。」最後一場，黎明的金句此起彼落：「聽日就星期日喇，大家可以瞓吓，起身可以食個麵，跟住繼續再瞓。我就好正常，大家都一齊開心，好滿足。」他表示做完演唱會後，就會繼續工作：「我會用心做好工作畀大家，做好自己嗰一部份，上天就會睇到嘅。最近天氣有啲翳焗，可能大家都會受呢個天氣影響，出去做吓運動，出身汗就會好啲。」
「Good luck to you」
演繹《那有一天不想你》前，黎明說：「好多時都覺有啲人與人之間聚會唔捨得，好似朋友燒嘢食，有一刻會唔捨得。可能我年長咗，我唔介意你哋叫我uncle或阿叔。有啲嘢想分享吓，越唔捨得就越要放手，就好似細個好鍾意電視唔捨得熄，結果俾爸爸用膠尺打背脊。」終於到曲終人散，黎明說：「Good Luck to you,Good Luck to everyone,Good Luck to Hong Kong,Good Luck to all over the world！」
至於外圍的逾萬觀眾坐到去大會堂，大家帶齊螢光棒、食物聽歌野餐，散場時塞人又塞車！
昨傍晚5時許，本報記者到場發現約40多名工作人員正在拆帳篷、音響和觀眾席，現場還見到有很多滅火筒，工作人員正在執拾，不知是否中國製帳篷不符合消防規格，所以主辦機構在開騷時安排了大量滅火筒在場戒備，fans在網上留言依依不捨：「我捨不得，只是時間回不去了！」
採訪：卓寶花、曹家誠、徐錦池
攝影：仇志德、葉君海
