一年一度母親節，從政嘅如果9月要選立法會，相信噚日「指定動作」都係落區派花，亦都有啲會喺facebook分享吓母親節點滴兼溫馨合照，𠱁媽咪之餘順便呃吓like，成績都唔錯。不過偏偏有「一男子」諗住應節出個post時，撞晒大板……
成功呃like人士、好似公民黨「岳少」楊岳橋（Alvin）咁，就喺fb上載佢握住婆婆手嘅相話：「我握着外婆的手，她今年103歲。」由小學時與外公外婆喺土瓜灣居住嘅日子講起，楊岳橋話外婆對佢疼愛有加，不過老人家身子與頭腦都每下愈況，「我覺得無事常相見，看看她，也讓她看看我，就是永遠的及時。見面不用多言，握一握手，就像小時候她拖着我一樣就夠」。呢一番話平均每個小時吸到逾千like，仲連母親節限定「紫花」符號都收幾千。
葉劉獲囡囡送果籃
泛民建制議員各自喺fb貼相賀母親節，好似資訊科技界莫乃光搵咗張1985年同媽媽合照應節；新民黨葉劉淑儀因為囡囡喺外國讀書，冇返來陪佢，但就訂咗個朱古力果籃𠱁佢。葉劉話以前慶祝都係自己埋單，自從囡囡去年做實習有收入都會爭住畀錢，認真孝順。
不過又唔係個個政治人物都可以呃到like，好似香港「一男子」、超然特首梁振英咁，佢噚日上載咗張鮮花圖片，「祝全香港的母親：母親節快樂。」點估到咁簡單一句都有超然成績，幾乎平均每個鐘頭吸1,000個嬲，到噚晚已有超過9,000個嬲。
李八方
mailto:[email protected]