【慎入】嚇親人！泰國試真皮染血booties
呢排ViuTV牽起香港一陣真人騷熱，但去旅行、搏擊同煮飯仔又點會咁易餵飽香港人胃口？4As廣告公司Ogilvy & Mather曼谷分部最近同動物權益組織People for the Ethical Treatment of Animals Foundation（PETA）合作，喺曼谷一個高檔商場砌出一間實質為展覽館的偽皮具店，仲用拍攝真人騷方式，透過鏡頭捕捉參觀者最直接反應。
普普通通一個展覽有乜咁大不了？查實店內陳列出多款皮具用品，表面睇絕對比得上大牌設計，但一打開或試着就會出事，皆因無論係手袋內、外套內、皮帶底部、手套內裡抑或高跟booties內，全部都係血淋淋似心臟跳動設計，佈滿「血漿」同肌肉紋理，都咪話唔嚇人！有好幾位「客人」仲一臉不相信咁打開個袋一睇再睇，認真吊詭。
呢個廣告嘅主要目的，其實都係想勸大家唔好買咁多真皮製品，因為背後都代表住一條生命嘅犧牲。咁講法，其實你同我每日用住嘅皮具，雖然冇血漿，但都一樣血淋淋... ...
記者：黃樂雯
機械儀器模仿的「心臟」極為神似，唔打格仔真係會嚇一嚇。（圖片來源:petaasia）
真皮銀包一樣血肉模糊。（圖片來源:petaasia）
皮帶背面都一樣。（圖片來源:petaasia）
片段其中一幕係女客人試手套上手，脫下時發現成手血漿。（圖片來源:Behind the Leather/Youtube截圖）
場景之所以會選址曼谷，只因泰國係其一個出口同製造最多鱷魚皮製品嘅地區，要保護動物就要由源頭開始。（圖片來源:petaasia）
偽皮具店望落好地地，但原來係一個化咗妝嘅「屠場」。（圖片來源:Behind the Leather/Youtube截圖）
其實啲手袋設計比得上大牌，好似係。（圖片來源:Behind the Leather/Youtube截圖）
眾女士見到袋內跳動物反應，其實佢地真係好冷靜。（圖片來源:Behind the Leather/Youtube截圖）
係，我認我係標題黨，唔係點引到你入來？其實真係有呢一幕，有女顧客試完鞋後留底一堆「血漿」喺腳背。（圖片來源:Behind the Leather/Youtube截圖）