市場成日話樓價跌，樓市就快冧，但係過去幾日走去睇新盤嘅人又好鬼墟冚。好似會德豐（020）旗下將軍澳新盤Savannah，售樓廠連續兩日逼爆。發展商聲稱，周末兩日加埋有超過兩萬人到場參觀喎，唔通啲仔女為慶祝母親節，帶埋阿媽去睇樓，順便叫阿媽幫手畀首期？
除咗潛在買家，會德豐嘅行家亦都好畀面，連日都有唔同發展商嘅高層走去呢個售樓廠探班。先係前日有華懋集團售樓部高層吳崇武，噚日輪到英皇國際（163）執行董事張炳強（Donald）專登到場，同會德豐地產常務董事黃光耀與主席梁志堅打牙骹，睇嚟會德豐班高層嘅人緣都幾好。
雖然話同行如敵國，不過有時大家坐埋同一條船，應該睇住行情，互相照應，先至可以一齊搵到銀。