以夫妻檔起家嘅內地電動兩輪車生產商雅迪（1585）今日招股，不過，噚日記者會上，只得老闆董經貴獨挑大樑，老闆娘冇影。原來老闆娘錢靜紅都在場，但就選擇做董生背後嘅女人，低調唔想見人。
喺傳媒追問之下，董經貴就搵埋太太，一齊企喺公司近期推出嘅全新電動車後邊畀大家影相。其實以佢哋呢對夫妻檔，加埋部咁型嘅電動車，冇理由唔自製《天若有情》feel去吸睛兼吸水嘅，兩位應該坐埋上部車度影相吖嘛。
佢兩公婆分別46歲同43歲，後生時一齊喺工廠打工，1997年共同發展電動車事業，家陣搞埋上市㖭，認真長情。
咁啱噚日就係母親節，老闆娘亦都好sweet咁話，啲小朋友一早就打電話畀佢，祝佢母親節快樂。