陳寶珠、梅雪詩（阿嗲）前晚喺灣仔演藝學院演出粵劇《牡丹亭驚夢》，咁啱撞正師傅、粵劇名伶白雪仙88歲大壽，身為徒弟嘅寶珠姐同阿嗲，仲有仙姐一班好友包括政務司司長林鄭月娥、陳善之、汪明荃、寰亞老闆林建岳媽咪余寶珠等，一齊喺謝幕時上台為仙姐慶祝，台下戲迷就大唱生日歌。
唔收徒弟禮物
88歲嘅仙姐精神奕奕被陳善之邀請上台切蛋糕，林鄭就送花畀仙姐，仙姐話：「多謝大家咁捧場，今日不足嘅地方實在太多啦！你哋要指導同教導我哋，希望粵劇永遠有你哋捧場，帶多啲朋友嚟，希望粵劇永遠興旺，越做越進步。多謝大家畀我呢個驚喜，希望大家身體健康。」
完騷後，寶珠姐同阿嗲一齊接受訪問，佢哋都話唔滿意表現，問到係咪仙姐在場所以有壓力？寶珠姐笑話：「初時係有，不過做做吓就唔記得咗仙姐在場。」問到有冇送禮同點慶祝，阿嗲就話：「一早去斟茶畀師傅飲。仙姐唔使我哋送，慳住我哋荷包。」
撰文：馮仁昭