今日母親節，大家送咗乜嘢禮物畀媽媽呢？又係咪啱佢心水？早前在網上看到幾篇關於母親節最差禮物的文章，當中以下幾類應該係媽媽最唔想收到的，你又有冇試過買？或者會唔會講正你今年買嗰份？不過係都唔緊要，話晒都係一番心意，好過兩手空空乜都冇吖，下年買番啱咪得囉。
1.有關減肥嘅書或DVD
送呢啲即係話佢肥，提佢要減，女人大忌。
2.Lotion、沖涼液等
擺明係臨時臨急求其買，你估係一班friend玩交換聖誕禮物咩，冇誠意。
3.唔啱size嘅衫
買大咗都還好，如果買細咗就……總之就係尷尬啦。
4.自製coupon
如果你仲係小朋友，送啲自製嘅「一日家務換領券」、「免費洗廁所服務換領券」，阿媽都有可能會好冧，覺得你又乖又孝順，但如果你已經係大人就……算啦，阿媽信你至奇。
5.父親節都啱用嘅嘢
搞清楚，母親節同父親節係兩樣嘢，送畀阿爸阿媽嘅禮物應該係唔同嘅，送番啲淨係阿媽啱用嘅禮物啦，唔好好似某啲政黨成日撈亂晒先得㗎。
資料及圖片來源：beliefnet、互聯網
記者：黃子配
