細路嗰陣好似乜都唔怕，又或者唔識怕啦；但人大咗之後，就開始驚呢樣驚嗰樣，亦都係事實。
仲係後生仔嘅時候，日日放學就隨街浮。落樓下公園踢波打籃球啦、同啲三唔識七嘅細路玩捉啦、鬥快擒上嗰啲有成半層樓咁高嘅鋼架頂啦；個氹氹轉明明轉到有成時速40公里咁快，都仲夠膽單手捉住扶手，另一邊身挨晒出去係咁揈。嗰陣啲公園設備冇咁齊全，鋼架下面係石屎地，氹氹轉旁邊，亦冇話好似𠵱家咁周圍都係軟墊，𠵱家諗番，真係唔知嗰陣點解咁夠薑。
大個咗，先開始又怕痕又怕痛，些少嘢就嗌到拆天。記得以前暑假落街玩之前，一定會放定條毛巾同支水入雪櫃冰格；玩到身水身汗咁返屋企，就立即打開個冰格，攞條雪凍咗嘅毛巾一嘢敷落塊面到，嘩爽到呢！塊面熱到紅晒嗰陣，條毛巾一掂落去，好似會聽到「滋」一聲咁；再攞埋支已經雪成冰柱嘅水出嚟，睇住慢慢、慢慢咁溶，逐少逐少咁啜啲冰水——𠵱家？你出完汗未必會立即飲冰水、亦都唔會再攞冰毛巾敷面；因為，我哋都大個咗，我哋，都怕攝親。
年少多好。細個嘅廉價快樂，𠵱家已經變成咗無價嘅回憶。細路仔想快啲長大，大人又會掛住細個嗰陣嘅快樂時光。細個嗰陣冇錢，要諗盡辦法自娛；到大個，就想盡辦法去買番細個得唔到嘅嘢。物質，錢買得到，但係嗰份單純嘅快樂，過咗，就係過咗。我哋屋企嗰堆玩具同波鞋，其實代表住一個時代——嗰個無憂無慮嘅美好時代。
呢篇稿，係喺兩單拍攝工作之間寫嘅，拍攝地點，喺一個屋邨球場，附近有個公園仔。望住冇乜人喺到玩嘅公園，又諗起自己細個係幾恨去公園玩。時代唔同，好多嘢都變咗，亦有好多值得保留嘅嘢消失咗；諗諗吓有啲感觸，就用廣東口語寫呢段字。
伍家謙
多媒體工作者