李斯特城喺今季成為英超神話，由上季驚險護級成功到今季勇奪聯賽冠軍，原來喺歐洲另一邊都有隊「俄超李城」。羅斯托夫（圖）喺上季俄超都係幾乎降班，靠較多贏波場數力壓莫斯科魚雷喺聯賽排尾三，出戰升降班附加賽擊敗俄甲對手杜斯奴先唔使降班；但今季羅斯托夫完全唔同晒變咗做爭標分子，踢到球季最後階段仲同莫斯科中央陸軍喺榜首叮噹馬頭，上周五俄超又贏一場，喺主場以2:1擊敗莫斯科火車頭，不過坐咗榜首唔夠一日又被中央陸軍過番頭，剩番三輪聯賽仲有得爭。