這天第六場四班泥地1200米黃頌顯盃，李易達訓練、準新郎哥梁家俊操刀的4歲澳洲自購馬「機緣再現」，第七次在港出賽兼連續第二次跑泥地，此駒沿途居五六位，末段殺上透出後，一度被其他後上馬趕過，最終憑耐力反敗為勝開齋，單Win及組合獨贏A2，分別派66及22元正。
上屆黃頌顯盃由華人組合鄭雨滇及蘇偉賢以「星際武士」奪冠，今屆則由另一對本地騎練梁家俊及李易達捧盃，不過頭馬「機緣再現」馬主李偉然至係這天主角，事關佢第四場已憑「福爾摩斯」勝出蒲偉士碟，個人名下兩駒這天出齊，結果佢順利起孖連捧兩盃，與靚靚千金Gina再一次揚威凱旋門，取得在港養馬代表作。不過比前豐滿了的Gina 唔知係咪怕曬，今場佢拉完頭馬，似不想等梁家俊要先行覆磅才可進行盃賽頒獎禮，於是Gina行埋一邊，錯過了「機緣再現」的頒獎儀式。
呢場泥地短途賽拉士鬥得好激，女將蔣嘉琦夥拍師傅呂健威的「執子之手」於最外叠如飛殺上，一度看似贏得，最終卻被內側的「機緣再現」回氣再上反先而功敗垂成，嘉琦BB繼第五場「至尊飛星」後再做阿二。
至於三、四名則由落飛馬「至叻熊」及大冷門「情意相投」後上瓜分，四重彩派四萬七千幾。
這天三T連場爆冷，正獎冇人中，中頭兩關已有25萬元安慰獎收。